ఓటు గెలవాలి... ప్రజాస్వామ్యం నిలవాలి!

ఓటు గెలవాలి... ప్రజాస్వామ్యం నిలవాలి!
​ఎన్నికలు రాగానే ఆశల పల్లకీలు ఊగే కాలం మొదలవుతుంది. ఓటర్ల ముంగిటకు వచ్చి చేతులు జోడించి నమస్కారాలు పెట్టే నాయకులు, ఓట్లు పడ్డాక మాత్రం గడప తొక్కడానికి కూడా వెనుకాడే పరిస్థితులు మనం చూస్తూనే ఉన్నాం. నామినేషన్ల ఘట్టం ప్రారంభమవుతున్న ఈ తరుణంలో రైల్వే కోడూరు నియోజకవర్గ ప్రజలు, నాయకులు ఒక్కసారి ఆత్మపరిశీలన చేసుకోవాల్సిన అవసరం ఎంతైనా ఉంది. ప్రజాస్వామ్యంలో ఓటు అనేది కేవలం ఒక గుర్తుపై వేసే ముద్ర మాత్రమే కాదు, అది ఐదేళ్ల భవిష్యత్తును నిర్ణయించే శక్తివంతమైన ఆయుధం. ఎన్నికల కమిషన్ స్పష్టమైన నిబంధనలు రూపొందించినప్పటికీ, క్షేత్రస్థాయిలో నామినేషన్లు వేయకుండా అడ్డుకోవడం, భయభ్రాంతులకు గురిచేయడం, బెదిరింపులకు పాల్పడటం వంటి అక్రమాలు చోటుచేసుకుంటే అది ప్రజాస్వామ్య స్ఫూర్తికే గొడ్డలిపెట్టుగా మారుతుంది.
​పోటీ చేసే హక్కు రాజ్యాంగం ప్రతి పౌరుడికీ కల్పించిన ప్రాథమిక హక్కు. నామినేషన్ పత్రాలను చింపేయడం, అభ్యర్థులను భయపెట్టి పోటీ నుంచి తప్పించడం ద్వారా సాధించే ఏకగ్రీవాలు లేదా గెలుపులు నిజమైన ప్రజామోదాన్ని ప్రతిబింబించవు. బలవంతంగా, భయపెట్టి తెచ్చుకున్న ఏకగ్రీవానికి, ప్రజలు మనస్ఫూర్తిగా ఎన్నుకున్న గెలుపునకు నక్కకూ నాగలోకానికి ఉన్నంత తేడా ఉంటుంది. పోటీని అడ్డుకుని తాము గెలిచామని సంబరపడటంలో అర్థం లేదు, నిజానికి అక్కడ ప్రజల ఓటు హక్కు, ప్రజాస్వామ్య నియమాలు ఓడిపోతున్నాయి. రాజ్యాంగబద్ధంగా నామినేషన్ దాఖలు చేసే అవకాశం కల్పించడమే నిజమైన నాయకత్వ లక్షణం.
​ప్రజాస్వామ్య వ్యవస్థలో చట్టం అందరికీ ఒకేలా వర్తించాలి. ఏ పార్టీ వ్యక్తి అయినా, ఎంతటి అధికారంలో ఉన్నా సరే, మరొకరు నామినేషన్ వేసే హక్కును అడ్డుకోవడం తీవ్రమైన నేరం. రైల్వే కోడూరు ప్రాంతంలో ఇటువంటి అక్రమాలకు తావులేకుండా నిరోధించడానికి ఎన్నికల అధికారులు, యంత్రాంగం నిష్పాక్షికంగా, కఠినంగా వ్యవహరించాల్సిన అవసరం ఉంది. అభ్యర్థులందరికీ తగిన రక్షణ కల్పించి, భయం లేని స్వేచ్ఛాయుత వాతావరణంలో నామినేషన్లు వేసేలా, పారదర్శకంగా ప్రక్రియ జరిగేలా చూడాలి. బెదిరింపులకు పాల్పడే వారిపై చట్టపరమైన చర్యలు తీసుకున్నప్పుడే వ్యవస్థపై ప్రజలకు నమ్మకం పెరుగుతుంది.
​అదే సమయంలో ఓటర్లు కూడా తమ ఓటు విలువను గ్రహించి ఆలోచించాలి. స్వేచ్ఛగా నామినేషన్ వేసే అవకాశం లేకుండా చేయడం లేదా అక్రమాలతో ప్రక్రియను ప్రభావితం చేయడం ప్రజాస్వామ్య మనుగడకే ప్రమాదకరం. అక్రమాలను అరికడుతూ, ప్రశాంత వాతావరణంలో పారదర్శకంగా ఎన్నికలు నిర్వహించినప్పుడే నిజమైన నాయకుడు ఎన్నుకోబడతాడు. ఓటు బతికినప్పుడే ప్రజాస్వామ్యం బతుకుతుందనే సత్యాన్ని రైల్వే కోడూరు నియోజకవర్గంలోని ప్రతి ఒక్కరూ గుర్తుంచుకోవాలి.