డీఎస్సీ నిరసన కాక: బూత్ కమిటీ అధ్యక్షుడు భరత్ కుమార్ రెడ్డికి పోలీసు నోటీసులు!

డీఎస్సీ నిరసన కాక: బూత్ కమిటీ అధ్యక్షుడు భరత్ కుమార్ రెడ్డికి పోలీసు నోటీసులు!
రైల్వే కోడూరు సెప్టెంబర్ 28 జై భీమ్ వాయిస్ టుడే:
​ఉపాధ్యాయ నియామక పరీక్షల చుట్టూ ముసురుకున్న అక్రమాల మేఘాలు, దానికి తోడు రాజకీయ వర్గాల్లో చెలరేగిన నిరసన జ్వాలలు తిరుపతి జిల్లా రైల్వే కోడూరు నియోజకవర్గాన్ని ఒక్కసారిగా ఉలిక్కిపడేలా చేశాయి. నియామకాల ప్రక్రియలో అవినీతి చోటుచేసుకుందని, అర్హులకు తీవ్ర అన్యాయం జరిగిందంటూ చేపట్టిన ఆందోళన కార్యక్రమం తీవ్ర కలకలం రేపిన నేపథ్యంలో, రాయలసీమ జోన్ బూత్ కమిటీ అధ్యక్షుడు తల్లెం భరత్ కుమార్ రెడ్డికి పోలీసులు సోమవారం ఉదయం నోటీసులు అందజేయడం స్థానికంగా పెద్ద ఎత్తున చర్చనీయాంశమైంది.
​పరీక్షల నిర్వహణలో పారదర్శకత పూర్తిగా లోపించిందని, బాధ్యులపై కఠిన చర్యలు తీసుకుని బాధితులకు తక్షణమే న్యాయం చేయాలంటూ రైల్వే కోడూరు పురవీధుల్లో భారీ స్థాయిలో నిరసన ఊరేగింపు సాగింది. ప్రజాస్వామ్యబద్ధంగా, శాంతియుత మార్గంలో నిరుద్యోగుల హక్కుల కోసం స్వరం వినిపిస్తే, ఆందోళనలను అణచివేసేలా అధికార యంత్రాంగం పోలీసులను ఉపయోగించి నోటీసులు జారీ చేయించడంపై స్థానిక నేతలు, యవత తీవ్ర ఆగ్రహావేశాలు వ్యక్తం చేస్తున్నారు.
​అధికార పక్షపు ఒత్తిళ్లకు తలొగ్గి పోలీసులు చర్యలకు పూనుకుంటున్నారని భరత్ కుమార్ రెడ్డి ఘాటుగా విమర్శించారు. ఇటువంటి బెదిరింపు చర్యలకు వెరచేది లేదని, మోసపోయిన నిరుద్యోగార్థులకు, బాధితులకు న్యాయం జరిగే వరకు పోరాట క్షేత్రంలోనే ఉంటామని ఆయన తేల్చిచెప్పారు. వరుస పరిణామాలు, పరస్పర ఆరోపణలతో రైల్వే కోడూరు పరిసర ప్రాంతాల్లో రాజకీయ వాతావరణం ఒక్కసారిగా వేడెక్కింది.