కన్నులపండువగా శ్రీ కోదండరామ స్వామి ఆలయ ప్రారంభోత్సవం ప్రత్యేక పూజా కార్యక్రమంలో పాల్గొన్న కస్తూరి ,మాచినేని

కన్నులపండువగా శ్రీ కోదండరామ స్వామి ఆలయ ప్రారంభోత్సవం
​రైల్వే కోడూరు సెప్టెంబర్ 6 టుడే: తిరుపతి జిల్లా చిట్వేలి మండలం నగిరిపాడు గ్రామ పంచాయతీ పరిధిలోని ఎన్.ఉప్పరపల్లి హరిజనవాడలో ఆదివారం ఆధ్యాత్మిక శోభ ఉప్పొంగింది. నూతనంగా నిర్మించిన శ్రీ కోదండరామ స్వామి ఆలయ ప్రారంభోత్సవ మహోత్సవం భక్తిశ్రద్ధల నడుమ అత్యంత వైభవంగా జరిగింది. మేళతాళాలు, మంగళ వాయిద్యాల దివ్య మంగళ ధ్వనుల మధ్య గ్రామస్తులు, భక్తులు ఆలయ ప్రాంగణానికి ఘన స్వాగతం పలికారు.
​గ్రామ ప్రజల ప్రత్యేక ఆహ్వానం మేరకు ఈ పవిత్ర కార్యక్రమానికి తెలుగుదేశం పార్టీ సీనియర్ నాయకులు కస్తూరి విశ్వనాథ నాయుడు, ప్రముఖ పారిశ్రామికవేత్త మాచినేని విశ్వేశ్వర నాయుడు ముఖ్య అతిథులుగా హాజరయ్యారు. వేద పండితుల మంత్రోచ్ఛారణల మధ్య స్వామివారికి ప్రత్యేక పూజలు నిర్వహించి దర్శించుకున్నారు. గ్రామంలో శాంతి సౌభాగ్యాలు విలసిల్లాలని, ప్రజలందరికీ ఆ రామయ్య దివ్య ఆశీస్సులు ఎల్లవేళలా ఉండాలని ఈ సందర్భంగా ఆకాంక్షించారు.
​ఈ దివ్య ఘట్టంలో మాజీ మండల పరిషత్ ప్రాంతీయ ప్రతినిధి కట్టా గుండయ్య, మాజీ మండల పరిషత్ ప్రాదేశిక నియోజకవర్గ సభ్యులు కొండా వెంకటేష్, కట్టా లోకేష్, విభాగం ఇన్చార్జ్ బుంగటావల రాజశేఖర్, నియోజకవర్గ సమన్వయకర్త తుంగా నవీన్ కుమార్, కస్తూరి శివతో పాటు స్థానిక నాయకులు, ప్రజలు విశేష సంఖ్యలో పాల్గొని తీర్థప్రసాదాలు స్వీకరించారు.