అంబేడ్కర్‌పై విషం కక్కిన హమారా ప్రసాద్‌ కటకటాల వెనక్కి: సమకాలీన సామాజిక ఉద్రిక్తతలకు బాధ్యుడిపై చట్టం పంజా

అంబేడ్కర్‌పై విషం కక్కిన హమారా ప్రసాద్‌ కటకటాల వెనక్కి: సమకాలీన సామాజిక ఉద్రిక్తతలకు బాధ్యుడిపై చట్టం పంజా
రైల్వే కోడూర్ సెప్టెంబర్ 18 జై భీమ్ వాయిస్ టుడే:
హైదరాబాద్ లో ​రాజ్యాంగ నిర్మాత, భారత రత్న డాక్టర్ భీమ్‌రావ్ రామ్‌జీ అంబేడ్కర్‌పై అత్యంత హేయమైన రీతిలో అనుచిత వ్యాఖ్యలు చేస్తూ సమాజంలో విద్వేషాల నిప్పులు రాజేసేందుకు యత్నించిన వివాదాస్పద రచయిత హమారా ప్రసాద్‌ను పోలీసులు ఎట్టకేలకు అరెస్ట్ చేసి జైలుకు తరలించారు. సమాజ శ్రేయస్సుకు, రాజ్యాంగ స్ఫూర్తికి విఘాతం కలిగించేలా ఆయన రచించిన పుస్తక ఆవిష్కరణకు ప్రయత్నాలు ముమ్మరం చేసిన తరుణంలోనే ఈ పరిణామం చోటుచేసుకోవడం నగరంలో తీవ్ర ఉత్కంఠను రేకెత్తించింది.
విద్వేష రచనతో ఆగ్రహజ్వాలలు
జాతి గర్వించదగ్గ మహనీయుడిపై ఆధారరహిత ఆరోపణలు, అభ్యంతరకర వ్యాఖ్యలతో కూడిన పుస్తకాన్ని మార్కెట్లోకి తెచ్చేందుకు సదరు వ్యక్తి తెగబడ్డాడు. ఈ పుస్తక సారాంశం వెలుగులోకి రావడమే తడవుగా బహుజన, దళిత, ప్రజా సంఘాలు అగ్గిమీద గుగ్గిలమయ్యాయి. సామాజిక సమతుల్యతను దెబ్బతీసేలా ఉన్న ఈ కుట్రపూరిత యత్నాన్ని నిరసిస్తూ నిరసనకారులు సచివాలయం, ముఖ్యమంత్రి నివాసం ముట్టడికి యత్నించడం పరిస్థితి తీవ్రతకు అద్దం పడుతోంది.
న్యాయస్థానం రిమాండ్.. చంచల్‌గూడాకు తరలింపు
​సమాజంలో శాంతిభద్రతలకు విఘాతం కలిగించేలా, ప్రజల భావోద్వేగాలను తీవ్రంగా గాయపరిచేలా ఉన్న ఈ వ్యవహారంపై పలు పోలీస్ స్టేషన్లలో బాధితులు ఫిర్యాదులు చేశారు. ప్రజాందోళనల నేపథ్యంలో రంగంలోకి దిగిన పోలీసులు పలు కఠిన చట్టాల కింద కేసులు నమోదు చేసి నిందితుడిని అదుపులోకి తీసుకున్నారు. అనంతరం వైద్య పరీక్షలు పూర్తి చేసి న్యాయమూర్తి ముందు హాజరుపరచగా, కోర్టు ఆయనకు రిమాండ్ విధించింది. దీంతో పోలీసులు నిందితుడిని చంచల్‌గూడా కేంద్ర జైలుకు తరలించారు. భావ ప్రకటన స్వేచ్ఛ పేరిట మహనీయుల ప్రతిష్టకు భంగం కలిగిస్తే చట్టం ఊరుకోదని ఈ అరెస్టు స్పష్టం చేస్తోంది.