చీకటి వెలుగుల దోపిడీ.. నిద్రమత్తులో యంత్రాంగం!

చీకటి వెలుగుల దోపిడీ.. నిద్రమత్తులో యంత్రాంగం!
రైల్వే కోడూరు అక్టోబర్ 5 జై భీమ్ వాయిస్ టుడే:
​చెరువులు ఊరికి జీవనాధారాలు. కానీ, కొందరు స్వార్థపరుల కంటికి అవి అక్షయపాత్రలుగా కనిపిస్తున్నాయి. అధికారుల ఉదాసీనతను ఆసరాగా చేసుకుని, పగటిపూట సాధువుల్లా నటించే మట్టి దళారులు రాత్రి కాగానే యంత్రాలతో విరుచుకుపడుతున్నారు. పుల్లంపేట మండలం పరిధిలోని రంగంపల్లి, రెడ్డిపల్లి చెరువుల్లో గత కొన్ని రోజులుగా అక్రమ మట్టి తవ్వకాలు యథేచ్ఛగా సాగుతున్నాయి.
​చీకటి పడితే చాలు రంగంపల్లి, రెడ్డిపల్లి చెరువుల ప్రాంగణాలు భారీ యంత్రాల శబ్దాలతో మార్మోగిపోతున్నాయి. ఎలాంటి ముందస్తు అనుమతులు లేకుండా, ప్రభుత్వ నిబంధనలను కాగితాలకే పరిమితం చేస్తూ టన్నుల కొద్దీ మట్టిని తరలించుకుపోతున్నారు. రాత్రి వేళల్లో సాగుతున్న ఈ అక్రమ రవాణా వెనుక పెద్ద ఎత్తున సొమ్ము చేతులు మారుతోందనే విమర్శలు వెల్లువెత్తుతున్నాయి. చెరువు నిల్వ సామర్థ్యాన్ని దెబ్బతీస్తూ, నీటి వనరులను ఆవిరి చేస్తున్న ఈ తవ్వకాల వల్ల భవిష్యత్తులో భూగర్భ జలాలు అట్టడుగుకు పడిపోయే ప్రమాదం పొంచి ఉంది.
​ప్రభుత్వ నిబంధనల ప్రకారం చెరువుల్లో మట్టి లేదా పూడిక తీయాలంటే సంబంధిత నీటిపారుదల శాఖ, రెవెన్యూ శాఖల నుండి ముందస్తు అనుమతులు తప్పనిసరి. ఎంత పరిమాణంలో, ఏ అవసరం కోసం, ఏ సమయాల్లో తవ్వకాలు జరపాలో స్పష్టమైన మార్గదర్శకాలు ఉన్నాయి. అనుమతి లేని తవ్వకాలు చట్టరీత్యా తీవ్రమైన నేరం. ప్రభుత్వ ఆస్తిని దోచుకోవడమే కాకుండా, పర్యావరణ సమతుల్యతను దెబ్బతీసినందుకు నేరారోపణ కింద కేసులు నమోదు చేయాల్సి ఉంటుంది.
​అయితే, ఇన్ని స్పష్టమైన నిబంధనలు అమలులో ఉన్నప్పటికీ, గ్రామాల్లో రాత్రివేళల్లో యంత్రాలు స్వైరవిహారం చేస్తున్నా అధికారులు నిమ్మకు నీరెత్తినట్లు ఊరుకోవడం పలు అనుమానాలకు తావిస్తోంది. "అధికారులకు తెలియకుండా ఇదంతా జరుగుతుందా?" అని స్థానికులు బహిరంగంగానే ప్రశ్నిస్తున్నారు. సంబంధిత పాలకొలను అధికారులు కనీసం అటువైపు కన్నెత్తి చూడకపోవడం వారి బాధ్యతారాహిత్యానికి అద్దం పడుతోంది. ఉన్నతాధికారులు తక్షణమే స్పందించి తనిఖీలు చేపట్టకపోతే, ఈ అక్రమ తవ్వకాల వల్ల చెరువులు పూర్తిగా రూపురేఖలు కోల్పోయి ఊళ్లకు ఊళ్లే నీటి ఎద్దడిని ఎదుర్కోవాల్సి వస్తుంది. ఇప్పటికైనా యంత్రాంగం నిద్రమత్తు వదిలి అక్రమార్కులపై కఠిన చర్యలు తీసుకోవాలని ప్రజలు కోరుతున్నారు.