నందిగామ 27వ వార్డులో టీడీపీ రెబల్ కలకలం.. స్వతంత్ర అభ్యర్థిగా దాసరి గోపిరాజు నామినేషన్

పార్టీ అవకాశం ఇవ్వకపోయినా వెనక్కి తగ్గేది లేదు.. ప్రజాబలంతో గెలిచి తీరుతా: దాసరి గోపిరాజు.

జైభీమ్ వాయిస్ టుడే
నందిగామ.

నందిగామ మున్సిపల్ ఎన్నికల నేపథ్యంలో 27వ వార్డులో రాజకీయాలు ఆసక్తికరంగా మారుతున్నాయి. తెలుగుదేశం పార్టీ నుంచి అవకాశం లభించకపోవడంతో ఆ పార్టీ రెబల్ అభ్యర్థిగా బరిలోకి దిగిన దాసరి గోపిరాజు ఆదివారం స్వతంత్ర అభ్యర్థిగా నామినేషన్ దాఖలు చేశారు. దీంతో 27వ వార్డులో రాజకీయ సమీకరణాలు మారుతున్నాయనే చర్చ స్థానికంగా మొదలైంది.

ప్రజాబలమే నా బలం.. పోరాడి గెలుస్తా

ఈ సందర్భంగా దాసరి గోపిరాజు మాట్లాడుతూ టీడీపీ అధిష్ఠానం తనకు పోటీ చేసే అవకాశం కల్పించకపోయినా వెనక్కి తగ్గే ప్రసక్తే లేదని స్పష్టం చేశారు. పార్టీ బలం కంటే ప్రజల ఆదరణ, ప్రజాబలమే తనకు ముఖ్యమని పేర్కొన్నారు. డీవీఆర్ కాలనీతో పాటు 27వ వార్డు ప్రజల మద్దతుతో ఎన్నికల్లో విజయం సాధిస్తానని ధీమా వ్యక్తం చేశారు. ఎస్సీ, బీసీ సామాజిక వర్గాల ప్రజల మద్దతు తనకు లభిస్తుందని ఆశాభావం వ్యక్తం చేశారు.

వార్డు అభివృద్ధే లక్ష్యం

27వ వార్డు ప్రజలు తనకు ఒక్కసారి అవకాశం కల్పిస్తే వార్డులోని సమస్యల పరిష్కారానికి నిరంతరం కృషి చేస్తానని గోపిరాజు హామీ ఇచ్చారు. ఇంటి పట్టాలు, డ్రైనేజీ వ్యవస్థ, వీధి దీపాలు, సీసీ రోడ్లు, తాగునీటి సమస్యల పరిష్కారానికి ప్రాధాన్యత ఇస్తానన్నారు. ప్రజలు ఎదుర్కొంటున్న సమస్యలను తన కుటుంబ సమస్యలుగా భావించి, అవసరమైతే ప్రభుత్వంతో పోరాడి నిధులు, అభివృద్ధి పనులు తీసుకొచ్చేందుకు కృషి చేస్తానని తెలిపారు.

27వ వార్డులో రసవత్తర పోరు

ఆదివారం నామినేషన్ దాఖలు సందర్భంగా మహిళలు, స్థానిక ప్రజలు పెద్ద సంఖ్యలో పాల్గొన్నట్లు సమాచారం. టీడీపీ నుంచి అవకాశం ఆశించిన అభ్యర్థి స్వతంత్రంగా బరిలోకి దిగడంతో 27వ వార్డు ఎన్నికల పోటీపై రాజకీయ వర్గాల్లో ఆసక్తి నెలకొంది. రానున్న రోజుల్లో ప్రచారం ఎలా సాగుతుంది, ఓటర్లు ఎవరికి మద్దతు పలుకుతారన్నది ఆసక్తికరంగా మారింది.