అంబేద్కర్ కీర్తిని మసకబార్చడం ఆకాశంపై ఉమ్మివేయడమే: డాక్టర్ బియ్యాల రమణ ఆగ్రహం

అంబేద్కర్ కీర్తిని మసకబార్చడం ఆకాశంపై ఉమ్మివేయడమే: డాక్టర్ బియ్యాల రమణ ఆగ్రహం
​రైల్వే కోడూరు సెప్టెంబర్ 11 జై భీమ్ వాయిస్ టుడే: భారత రాజ్యాంగ శిల్పి, విశ్వమానవుడు డాక్టర్ బి.ఆర్. అంబేద్కర్ మహోన్నత వ్యక్తిత్వాన్ని దెబ్బతీసేలా హమారా ప్రసాద్ రాసిన 'కల్పిత నాయకుడు' పుస్తకం ఒక చెత్త బుట్టతో సమానమని దళిత హక్కుల పోరాట నాయకులు డాక్టర్ బియ్యాల రమణ తీవ్రస్థాయిలో ధ్వజమెత్తారు. ఆకాశం వైపు చూసి ఉమ్మి ఊస్తే అది తిరిగి మన ముఖం మీదే పడుతుందనే చందంగా, విశ్వవ్యాప్త ఖ్యాతి గడించిన అంబేద్కర్ సేవలను కుదించేందుకు కుట్రలు పన్నుతున్న వర్గాలకు ఈ సమాజం తగిన బుద్ధి చెబుతుందని హెచ్చరించారు. ప్రపంచం గర్వించదగ్గ రీతిలో అంబేద్కర్ సాధించిన విద్యార్హతలు, డిగ్రీలతో పోలిస్తే హమారా ప్రసాద్ వంటి వారి జీవిత కాలం ఆయన ఒక్క డిగ్రీకి కూడా సాటిరాదని ఎద్దేవా చేశారు.
​దేశానికి దిశానిర్దేశం చేసిన రాజ్యాంగ విలువలను తప్పుదోవ పట్టించేలా కుట్ర పూరితంగా పుస్తకాలు వెలువరించినా, అంబేద్కర్ కీర్తి కిరీటాన్ని సడలించడం ఎవరి తరం కాదని స్పష్టం చేశారు. అణగారిన వర్గాలకు హక్కుల సంకెళ్లు తెంచి, ప్రజాస్వామ్య వ్యవస్థకు మూలస్తంభంగా నిలిచిన మహానీయుడి చరిత్ర తరతరాలకు స్ఫూర్తిదాయకంగా నిలుస్తుందని పేర్కొన్నారు. విజ్ఞతను మరచి, రాజకీయ ఉనికి కోసం చౌకబారు రచనలు చేసే వారి వ్యాఖ్యలను ప్రజాస్వామ్యవాదులంతా ఖండించాలని పిలుపునిచ్చారు.