మిన్నుముట్టిన గణనాథుని నిమజ్జన సంబరం: రూ. 19 వేలకు ప్రసాద లడ్డు కైవసం

మిన్నుముట్టిన గణనాథుని నిమజ్జన సంబరం: రూ. 19 వేలకు ప్రసాద లడ్డు కైవసం
​రైల్వేకోడూరు సెప్టెంబర్ 16 జై భీమ్ వాయిస్ టుడే: చిట్వేల్
మండల పరిధిలోని నాగవరం చొప్పవారిపల్లి గ్రామంలో గత మూడు రోజులుగా భక్తిశ్రద్ధలతో పూజలందుకున్న విఘ్నేశ్వరుని నిమజ్జనోత్సవం అత్యంత కోలాహలంగా సాగింది. గ్రామస్తుల ఆధ్వర్యంలో నిర్వహించిన ఈ వేడుకలతో గ్రామం ఆధ్యాత్మిక శోభతో మైమరిచింది. నిమజ్జన ఘట్టానికి ముందు భక్తులందరికీ భారీ స్థాయిలో అన్నదాన కార్యక్రమం నిర్వహించారు.
​అనంతరం గణనాథుని శోభాయాత్ర భక్తజన సందోహం నడుమ కన్నులపండువగా సాగింది. డప్పు వాయిద్యాల మోతలు, ఆకాశాన్ని తాకే బాణసంచా వెలుగులు, సంగీత హోరు మధ్య యువత ఉత్సాహంగా నృత్యాలు చేస్తూ వసంతాలు చల్లుకున్నారు. ఊరేగింపు పొడవునా గ్రామప్రజలు స్వామివారికి నీరాజనాలు అర్పించారు.
​ఉత్సవాల్లో ప్రధాన ఆకర్షణగా నిలిచిన స్వామివారి ప్రసాద లడ్డు వేలం పాట తీవ్ర పోటీ నడుమ సాగగా, గ్రామానికి చెందిన చింతూ దామోదర్ రెడ్డి రూ. 19,000 కు లడ్డును దక్కించుకున్నారు. ఈ సంబరాల్లో ఆకేపాటి ప్రతాపరెడ్డి, చెవ్వు శ్రీనివాసులు రెడ్డి, ఆకేపాటి నరేష్ రెడ్డి, శంకర్ రెడ్డి, నారం రెడ్డి వెంకట్ రెడ్డి, చెంగల్ రెడ్డి, నర్సా రెడ్డిలతో పాటు గ్రామస్తులు విశేష సంఖ్యలో పాల్గొని కార్యక్రమాన్ని విజయవంతం చేశారు.