జయంతి లో ప్రత్యేక పూజలు, కోలాటం సంబరాలు

వీరుల పాడు మండలంలో జయంతి గ్రామం దేవీ శరన్నవరాత్రి ఉత్సవాలు భక్తిశ్రద్ధలతో వైభవంగా ముగిశాయి. విజయదశమి పర్వదినాన్ని పురస్కరించుకుని చివరి రోజు శ్రీ అమ్మవారు రాజరాజేశ్వరి దేవి అలంకారంలో భక్తులకు దర్శనమిచ్చారు. అమ్మవారికి పుష్పాలతో ఉత్సవమూర్తిని సర్వాంగ సుందరంగా అలంకరించారు. అనంతరం సామూహిక కుంకుమార్చన నిర్వహించగా భక్తులు భక్తిపారవశ్యంతో పూజల్లో పాల్గొని అమ్మవారి ఆశీస్సులు పొందారు. చెడుపై మంచి సాధించిన విజయానికి ప్రతీకగా జరుపుకునే విజయదశమి వేడుకలు ఆలయంలో ఆధ్యాత్మిక వాతావరణాన్ని నింపాయి. పూజా కార్యక్రమాల అనంతరం భక్తులకు తీర్థప్రసాదాలతో పాటు అన్నప్రసాదం పంపిణీ చేశారు. భక్తులందరూ సుఖసంతోషాలతో, ఆయురారోగ్యాలతో, అష్టైశ్వర్యాలతో వర్ధిల్లాలని అమ్మవారిని ప్రార్థించినట్లు తెలిపారు. శరన్నవరాత్రి ఉత్సవాలు విజయవంతంగా ముగియడంతో భక్తులు హర్షం వ్యక్తం చేశారు.