ఉద్యోగార్థులకు నిరుద్యోగ భరోసా: వైభవంగా ముక్కా ఫౌండేషన్ బ్యాంక్ జాబ్ మేళా

ఉద్యోగార్థులకు నిరుద్యోగ భరోసా: వైభవంగా ముక్కా ఫౌండేషన్ బ్యాంక్ జాబ్ మేళా
​రైల్వే కోడూరు సెప్టెంబర్ 18 జై భీమ్ వాయిస్ టుడే:
స్థానిక రాఘవరాజుపురంలోని తెలుగుదేశం పార్టీ కార్యాలయంలో ముక్కా రూపానంద రెడ్డి ఫౌండేషన్ ఆధ్వర్యంలో నిర్వహించిన బ్యాంక్ ఉద్యోగాల ప్రతిభా ఎంపికల కార్యక్రమం అత్యంత ఉత్సాహపూరి వాతావరణంలో విజయవంతమైంది. ప్రాంతీయ యువతకు ఉపాధి అవకాశాలు కల్పించి, వారి భవిష్యత్తుకు బలమైన పునాది వేయాలనే ఉన్నతాశయంతో ఈ బృహత్తర కార్యక్రమానికి శ్రీకారం చుట్టారు.
​ఈ ఎంపికల వేదికగా 14కు పైగా ప్రముఖ బ్యాంకింగ్ సంస్థలు పాల్గొని, సుమారు 1900కు పైగా ఉద్యోగ అవకాశాలను అందుబాటులో ఉంచాయి. నియోజకవర్గ నలుమూలల నుండి పెద్ద సంఖ్యలో తరలివచ్చిన యువతీ యువకులు తమ అర్హతలకు తగిన అవకాశాలను అందిపుచ్చుకునేందుకు పోటీపడ్డారు.
​రైల్వే కోడూరు నియోజకవర్గ బాధ్యులు, కుడా అధ్యక్షుడు ముక్కా రూపానంద రెడ్డి కుటుంబ సభ్యులైన ముక్కా వరలక్ష్మి, ముక్కా సాయి వికాస్ రెడ్డి ప్రత్యక్షంగా హాజరై ఈ కార్యక్రమాన్ని పర్యవేక్షించారు. ఉద్యోగార్థులతో ప్రత్యేకంగా ముచ్చటించి, ఎంపికైన అభ్యర్థులకు శుభాకాంక్షలు తెలియజేస్తూ వారిలో ఆత్మవిశ్వాసాన్ని నింపారు.
​కేవలం ఉద్యోగాలు చూపించడమే కాకుండా, గ్రామీణ ప్రాంత యువతలోని నైపుణ్యానికి తగిన గుర్తింపు లభించేలా ఇటువంటి వేదికను కల్పించడం అభినందనీయం. సొంత ఊరిలోనే పారదర్శకమైన రీతిలో ప్రముఖ సంస్థలలో కొలువులు సాధించేలా ఫౌండేషన్ అందించిన సహకారం, ఉద్యోగాన్వేషణలో ఉన్న అనేకమంది నిరుద్యోగుల జీవితాల్లో నూతన వెలుగులు నింపింది.