అగ్రహారంలో తీరిన నీటి ఘోష!

అగ్రహారంలో తీరిన నీటి ఘోష!
​వారం రోజులుగా పొడిగొంతులతో అల్లాడిపోతున్న అగ్రహారం ఆర్ఆర్2 కాలనీ ప్రజల తాగునీటి తిప్పలకు ఎట్టకేలకు తెరపడింది. గ్రామస్థుల సమస్యను గుర్తించిన రాయలసీమ ప్రాంత బూత్ కమిటీ బాధ్యుడు తల్లెం భరత్ కుమార్ రెడ్డి తక్షణమే రంగంలోకి దిగి మంచినీటి ప్లాంట్ పునరుద్ధరణకు కృషి చేయడంతో ఊపిరి పీల్చుకున్నారు.
​మంగంపేట పంచాయతీ పరిధిలోని ఈ కాలనీలో వారం క్రితం మంచినీటి ప్లాంట్ అకస్మాత్తుగా మూతపడటంతో నిత్యం నీటి కోసం నివాసితులు పడరాని పాట్లు పడ్డారు. గుక్కెడు నీటి కోసం పక్క ఊళ్లకు తిరగాల్సిన దుస్థితి ఏర్పడింది. ఈ అపరిష్కృత సమస్యను స్థానికులు భరత్ కుమార్ రెడ్డి వద్ద ప్రస్తావించగా, ఆయన ఏమాత్రం ఆలస్యం చేయకుండా నేరుగా ప్లాంట్‌ను పరిశీలించారు. అక్కడి స్థితిగతులను స్వయంగా చూసిన అనంతరం మైనింగ్ సంస్థ ముఖ్య ప్రాజెక్టు అధికారి గోపీనాథ్ దృష్టికి బాధితుల కష్టాలను తీసుకెళ్లారు. గ్రామస్థులు పడుతున్న వేదనను వివరించి, తక్షణమే మరమ్మతులు చేపట్టి మంచినీటి సరఫరాను పునరుద్ధరించాలని కోరారు.
​ప్రజాసమస్య తీవ్రతను గుర్తించిన మైనింగ్ సంస్థ ముఖ్య ప్రాజెక్టు అధికారి సానుకూలంగా స్పందించి, తక్షణమే మరమ్మతు పనులు ప్రారంభించాలని సంబంధిత యంత్రాంగాన్ని ఆదేశించారు. త్వరితగతిన పనులు పూర్తి చేసి, స్వచ్ఛమైన నీటిని తిరిగి అందుబాటులోకి తెస్తామని హామీ ఇచ్చారు. ప్రజా సమస్య పట్ల వేగంగా స్పందించి దాహార్తి తీర్చిన భరత్ కుమార్ రెడ్డికి, అధికారులకు కాలనీవాసులు కృతజ్ఞతలు తెలియజేశారు.