మంగంపేట బైరైటీస్ దోపిడీపై శ్వేతపత్రం విడవాలి: నిజనిర్ధారణ కమిటీ తీవ్ర ఆందోళన

మంగంపేట బైరైటీస్ దోపిడీపై శ్వేతపత్రం విడవాలి: నిజనిర్ధారణ కమిటీ తీవ్ర ఆందోళన
​రైల్వే కోడూరు జై భీమ్ వాయిస్ టుడే:
దేశంలోనే వ్యూహాత్మక ఖనిజ వనరుగా వెలుగొందుతున్న మంగంపేట బైరైటీస్ నిల్వలు వేగంగా తరిగిపోతుండటంపై తీవ్ర ఆందోళన వ్యక్తమవుతోంది. దేశీయ పారిశ్రామిక అవసరాలను, భవిష్యత్ తరాల ప్రయోజనాలను తీవ్రంగా విస్మరిస్తూ, ఎగుమతుల నెపంతో ఈ సహజ సంపదను యథేచ్ఛగా తరలించడంపై తీవ్ర ఆగ్రహం వ్యక్తమవుతోంది. మంగంపేట బైరైటీస్ రక్షణ కోసం ఏర్పడిన నిజనిర్ధారణ కమిటీ సభ్యులు తిరుపతిలో తమ నివేదికను విడుదల చేస్తూ, కేంద్ర, రాష్ట్ర ప్రభుత్వాలు ఈ అంశంపై తక్షణమే స్పందించాలని ఘాటుగా డిమాండ్ చేశారు.
​ప్రపంచవ్యాప్తంగా లభ్యమయ్యే బైరైటీస్ ఖనిజంలో సగం కంటే ఎక్కువ నిల్వలు ఒక్క మంగంపేట ప్రాంతంలోనే లభ్యమవుతున్నాయి. దేశీయ చమురు, వాయువు అన్వేషణతో పాటు రసాయన, కాగితం, రబ్బరు వంటి పారిశ్రామిక రంగానికి ఇది ఎంతో ప్రాణాధారంగా మారింది. అయితే పది సంవత్సరాల కిందటి గణాంకాలతో పోలిస్తే ప్రస్తుతం ఈ నిల్వలు ఊహించని రీతిలో పడిపోయినట్లు అధ్యయనాలు వెల్లడిస్తున్నాయి. ఇటువంటి ఆందోళనకర పరిస్థితుల్లో స్వదేశీ అవసరాలను పక్కనబెట్టి, నామమాత్రపు ధరలకే విదేశాలకు కట్టబెట్టడం అత్యంత ప్రమాదకరమైన చర్యగా కమిటీ ప్రతినిధులు హెచ్చరించారు. గతంలో కుదిరిన ఒప్పందాలు, కేటాయింపుల్లో సాగిన అక్రమాలు, గ్రేడింగ్ మరియు ధరల నిర్ణయంలో చోటుచేసుకున్న లోపాలపై ఉన్నత స్థాయి సమగ్ర విచారణ జరిపించాలని గళమెత్తారు.
​ముఖ్యంగా తక్కువ గ్రేడ్ ఖనిజాన్ని శాస్త్రీయ పద్ధతుల్లో శుద్ధి చేసి దేశీయ అవసరాలకు వినియోగించుకునే అధునాతన సాంకేతిక రంగాన్ని ప్రోత్సహించాల్సిన అత్యవసర పరిస్థితి ఏర్పడింది. పర్యావరణ పరిరక్షణతో పాటు స్థానిక యువతకు ఉపాధి అవకాశాలు మెరుగుపరచాలని, నిర్వాసిత కుటుంబాలకు తగిన పునరావాసం కల్పించాల్సిన పూర్తి బాధ్యత అధికార యంత్రాంగంపైనే ఉందన్నారు. జిల్లా కలెక్టర్ తక్షణమే రంగంలోకి దిగి క్షేత్రస్థాయిలో విస్తృత తనిఖీలు నిర్వహించి, అక్రమ రవాణాకు అడ్డుకట్ట వేయాలని డిమాండ్ చేశారు. రాజ్యాంగ నిబంధనలు, చట్టబద్ధమైన హక్కులకు అనుగుణంగా భవిష్యత్ తరాల మనుగడ కోసం ఈ జాతీయ సంపదను కాపాడుకోవాల్సిన బాధ్యత ప్రతి ఒక్కరిపై ఉందని స్పష్టం చేశారు.
​ఈ సమావేశంలో నిజనిర్ధారణ కమిటీ సభ్యులు విజయవాడకు చెందిన మాజీ మంత్రి, మాజీ ఎంపీ వడ్డే శోభనాద్రీశ్వరరావు, విశ్రాంత ఐఏఎస్ అధికారి బి. శ్రీనివాసరావు, మాజీ ఎమ్మెల్సీ డాక్టర్ ఎం. గేయానంద్, సామాజిక కార్యకర్త డాక్టర్ వి. వసుంధర, మంగళంపేట బారైటీస్ ప్రాంత ప్రజల సంక్షేమ కమిటీ అధ్యక్షుడు కందారపు మురళి పాల్గొన్నారు.