నయా పల్లెల్లో పెన్షన్ల సందడి: 'ఎన్టీఆర్ భరోసా'ను అర్హులంతా వినియోగించుకోవాలి - ముక్కా లక్ష్మీకరరెడ్డి పిలుపు

'ఎన్టీఆర్ భరోసా'ను అర్హులంతా వినియోగించుకోవాలి - ముక్కా లక్ష్మీకరరెడ్డి పిలుపు
రైల్వే కోడూరు సెప్టెంబర్ 9 జేబిన్ వాయిస్ టుడే:
​పేదరిక నిర్మూలనతో పాటు అర్హులైన ప్రతి ఒక్కరికీ సామాజిక భద్రత కల్పించడమే ధ్యేయంగా ప్రభుత్వం అందిస్తున్న ఎన్టీఆర్ భరోసా పెన్షన్ పథకాన్ని ప్రజలంతా సద్వినియోగం చేసుకోవాలని తెలుగుదేశం పార్టీ సీనియర్ నాయకులు ముక్కా లక్ష్మీకరరెడ్డి పిలుపునిచ్చారు. క్షేత్రస్థాయిలో సంక్షేమ ఫలాలు ప్రతి ఇంటా వెలుగులు నింపాలన్నదే ప్రభుత్వ లక్ష్యమని, లబ్ధిదారులు ఈ అవకాశాన్ని వదులుకోవద్దని సూచించారు.
​ప్రభుత్వం నూతన పింఛన్ల మంజూరుకు దరఖాస్తులను ఆహ్వానిస్తూ అర్హులకు మరో సువర్ణ అవకాశాన్ని కల్పించింది. ఈ నెల 7వ తేదీ నుంచి ప్రారంభమైన ఈ ప్రక్రియలో నమోదుకు 16వ తేదీని చివరి గడువుగా నిర్ణయించింది. కాబట్టి అర్హత కలిగిన ప్రతి ఒక్కరూ నిర్ణీత గడువు దాటకుండానే తమ వివరాలను నమోదు చేసుకోవాల్సి ఉంటుంది.
​నూతనంగా దరఖాస్తు చేసుకునే వయోవృద్ధులు తమ ఆధార్ పత్రాన్ని జత చేయడంతో పాటు, ఆ పత్రానికి చరవాణి సంఖ్య అనుసంధానమై ఉండటం తప్పనిసరి. అలాగే ముందస్తుగా ఆధార్ ధ్రువీకరణ ప్రక్రియను పూర్తి చేసి ఉండాలి. వితంతు పింఛన్ల కోసం దరఖాస్తు చేసుకునే మహిళలు తమ ఆధార్ వివరాలతో పాటు భర్త మరణ ధ్రువీకరణ పత్రాన్ని సమర్పించాల్సి ఉంటుంది. సాంకేతిక లోపాలు లేకుండా చూసుకుని దరఖాస్తులను సకాలంలో పూర్తి చేయడం వల్ల లబ్ధి త్వరగా అందుతుంది.
​అర్హత ఉండి ఇప్పటివరకు పథకం పరిధిలోకి రాని ప్రతి ఒక్కరూ ఈ నెల 16వ తేదీ లోపు స్థానిక గ్రామ లేదా వార్డు పంచాయతీ కార్యాలయాలను సందర్శించి దరఖాస్తులు సమర్పించాలి. ప్రజా సంక్షేమమే పరమావధిగా సాగుతున్న ఈ పాలనలో అర్హులైన పేదలకు హక్కుగా అందాల్సిన భరోసాను సకాలంలో ప్రాప్తింపజేసుకోవడం ఎంతో అవసరం.